پاکستان سلامتی کونسل توں کشمیریاں کوں حق خود ارادیت ڈیواونڑ تئیں نال راہسی،کشمیریاں وکالت اتے ترجمانی کریسوں،وزیراعظم عمران خان دا یوم سیاہ تے ویڈیو سنیہا

اسلام آباد ۔ 27 اکتوبر (اے پی پی) وزیراعظم عمران خان آکھیے جو پاکستان کشمیری عوام دی سیاسی، سفارتی اتے خلاقی حمایت جاری رکھیسی، پاکستان سلامتی کونسل توں کشمیریاں کون حق خود ارادیت ڈیواونڑ تئیں نال راہسی،کشمیریاں وکالت اتے ترجمانی کریسوں۔اے گالھ انہاں کشمیریاں نال اظہار یکجہتی اتے بھارتی غاصبانہ قبضے دے حوالے نال منائے گئے یوم سیاہ دے موقع تے اپنڑے سنیہے اچ کیتی اے۔انہاں آکھیے جو اج سیاہ ڈینہہ اے جڈاں 72 سال پہلے بھارت اپنڑی فوج کشمیر اچ بھیجی ہئی بھل اقوام متحدہ دی سلامتی کونسل بھارت دی اپنڑی درخواست تے اے فیصلہ ڈتا ہا جو کشمیری پاکستان یا بھارت نال رہنڑ دا آپ فیصلہ کرن،ایندے باوجود بھارت انہاں کوں اے حق ڈیونڑ دی بجائے دھوکہ ڈتے اتے کشمیریاں دی نسل کشی جاری رکھی ہوئی اے،مقبوضہ وادی اچ دھاندلی زدہ انتخابات نال کشمیریا ں کوں ورغلاونڑ دی کوشش کیتی گئی جیندے خلاف کشمیریاں سراپا احتجاج بنڑین۔ وزیراعظم آکھیا جو حق خودارادیت کیتے ہنڑ تئیں ہک لکھ کشمیری شہید تھی چکین، مود ی 5 اگست کوں مقبوضہ کشمیر اچ کرفیو لا تے کشمیر دی حیثیت بدلنڑ دی سازش کیتی اے۔ انہاں آکھیے جویوم سیاہ دا مقصد کشمیریاں کوں اے دساونڑ اے جو پاکستان انہاں دے ہر جاہ تے نال اے،پاکستان دی عوام، چارے صوبے کشمیری بھراوان دے نال کھڑن،پاکستان ہمیشہ کشمیریاں نال کھڑا راہسی۔ انہاں آکھیا جو ہتھیارچاونڑ دی گالھ کرنڑ آلے کشمیریاں اتے پاکستان نال دشمنی کریندے پین،بھارت ایہو چاہندے جو پلوامہ جھیاں کوئی واقعہ تھیوے اتے او پاکستان تے حملے کرے،بہانے نال ولا کشمیریاں تے ایں توںوی ودھ مظالم کیتے ونجن،اساں کشمیریاں دے اخیر تئیں اخلاقی ، سفارتی اتے سیاسی مدد کرنڑی اے،کشمیریاں دی تحریک ہنر کوئی نئین ڈک سگدا،جیکر مودی حقائق جانرن چاہندن تاں مقبوضہ کشمیراچ ریفرنڈم کراگھنن۔ وزیراعظم آکھیے جو پورے جگ کوں مسلہ کشمیر تے سجاکا کیتے،امریکی صدر ڈونلڈ ٹرمپ ، برطانوی وزیراعظم سودھے سارے عالمی رہنماواں کوں کشمیر دی صورتحال ڈسائی اے،اقوام متحدہ دی جنرل اسمبلی نال خطاب اچ جگ تے مسلہ کشمیر کھلیے، بھارت 9لکھ فوج کشمیر اچ دہشت گردی دے خلاف نئیں بھل کشمیریاں دے خلاف دہشت پھیلاونڑ کیتے رکھی ہوئی اے،مودی حکومت کہیں وی طریقے نال پاکستان کوں کشمیردی صورتحال دا ذمہ داربنڑاونڑ چاہندی اے تاں جو جگ دی توجہ کشمیر توں ہٹے بھل اساں کشمیریاں دی اخلاقی ، سیاسی اتے سفارتی مدد کریندے راہسوں اتے سلامتی کونسل توں کشمیریاں کوں انہاں دا حق خود ارادیت ڈیوا تے راہسوں۔