اسلام آباد۔26اکتوبر (اے پی پی)سینیٹ فرانس اچ آزادی اظہار رائے دے ناں تے اسلام اتے مسلماناں تے مسلسل حملیں تے اسلامو فوبیا دا نوٹس گھندے ہوئیں نبی کریم دے گستاخانہ خاکیں دی ول اشاعت دی شدید مذمت کریندے ہوئیں بین الاقوامی برادری تے زور ݙتے جو او ایں طرح دے واقعات کوں روکݨ کیتے اقدامات کرے تاں جو پر امن بقائے باہمی اتے مذہبی و بین المذاہب ہم آہنگی کوں یقینی بݨایا ونج سڳے سنوار کوں سینیٹ اجلاس اچ سینیٹر ڈاکٹر شہزاد وسیم آکھیا جو فرانس اچ گستاخانہ خاکیں تے مسلماناں دے خلاف نفرت انگیز اقدامات نال پوری دنیا دے مسلماناں دے جذبات مجروح تھن ، پوری مسلم دنیا اچ کاوڑ پاتی ویندی اے ۔وزیراعظم وی آکھیے جو اسلامو فوبیا نال دنیا دے امن کوں خطرہ اے تے پر امن بقائے باہمی کوں ودھ خطرہ تھی سڳدے ، ایوان دے وی ایہے جذبات ہن۔ انہاں آکھیے جو او ایں حوالے نال قرارداد پیش کرݨ چاہندن ۔ چیئرمین آکھیا جو ایں حوالے نال رولز معطل کرݨ دی تحریک گھن آؤ ، کشمیر دے حوالے نال وی قرارداد آوݨی اے ، ارکان ایں حوالے نال قرارداد گھن آوݨ چاہندن، اے ساریں دا سانجھا معاملہ اے۔ بعد اچ سینیٹر ڈاکٹر شہزاد وسیم رولز معطل کرݨ دی تحریک پیش کیتی جیں دی چیئرمین منظوری ݙتی۔ جیں دے بعد انہاں آپݨی تے بئے ارکان ولوں مشترکہ قرارداد پیش کیتی جیں اچ آکھیا ڳیا جو سینیٹ آف پاکستان اسلام اتے مسلماناں تے آزادی اظہار رائے دے ناں تے تھیوݨ آلے حملیں تے اسلامو فوبیادے ودھدے ہوئے واقعات تے تشویش دا اظہار کریندے ۔ قرارداد اچ آکھیا ڳیا جو سینیٹ آف پاکستان انہاں واقعات اتے نبی کریم دی ناموس تے حملیں دی مذمت کریندے ۔ قرارداد وچ آکھیا ڳے جو ایں طرح دے قابل مذمت اقدامات بالخصوص جݙاں حکومتاں دی طرفوں انہاں دا ارتکاب کیتا ونڄے ، بہوں خطرناک اتے مختلف مذاہب دے منݨ آلے وچال ونڈ کوں مزید ودھارا ݙیوݨ آلے ہن ۔ قرارداد اچ ایں عزم دا اظہار کیتا ڳے جو حضور نبی کریم دے نال اساݙی وابستگی ہر چیز توں ودھ تے اتے اساݙے عقیدے دا حصہ اے اتے کوئی وی مسلمان ایں طرح دے حملیں کوں برداشت نی کرسڳدا ۔ چیئرمین قرارداد تے ایوان دی صلاح ڳھدی ایوان اتفاق رائے نال قرارداد دی منظوری ݙتی۔ چیئرمین سینیٹ ہدایت کیتی جو قرارداد دی کاپی متعلقہ سفیر تئیں پڄائی ونڄے ۔
سینیٹ دی فرانس اچ آزادی اظہار رائے دے ناں تے اسلام اتے مسلماناں تے مسلسل حملیں تے اسلامو فوبیا دےخلاف قراردادمنظور
مضمون کا ماخذ : ریل رش
متعلقہ مضامین
