اسلام آباد ۔ 23 مارچ (اے پی پی) وزیراعظم عمران خان آکھیے جو میکوں اے اکھیندے ہوئیں مانڑ تھیندے جو پاکستان قوم کہیں وی مصیبت دا اوکھ دا مقابلہ کرنڑ دی صلاحیت رکھیندی اے ۔ایں سال یوم پاکستان منیندے ہوئیں اساکوں اپنڑیاں صفاں اچ اتحاد، نظم و ضبط اتے جذبے دی ضرورت اے تاں جو اساں ایں آفت دا مقابلہ کرسگوں جیں پوری دنیا کوں اپنڑی وکیڑ اچ گھدا ہویا اے ۔ 23 مارچ اساڈی قومی تاریخ دا او سنہرا ڈینھ اے جڈاں برصغیر پاک و ہند دے مسلماناں ہندو اکثریت دے ظلم و جبر اتے غلامی دیاں زنجیراں توں جان چھڑاونڑ اچ ہک آزاد تے خود مختار مسلم ریاست دے قیام دا فیصلہ کیتا، ایں ڈینھ قائد اعظم دی قیادت اچ متحدہ ہندوستان دے مسلماناں اپنڑی تہذیب و تمدن دے تحفظ، اپنڑی بقا اتے سماجی و معاشی ترقی کیتے ایں بے مثال جستجو دا آغاز کیتا جیں دے نتیجے اچ دنیادے نقشے تے ہک آزاد و خود مختار مسلم ریاست وجود اچ آئی۔ وزیراعظم اسلامی جمہوریہ پاکستان عمران خان 23مارچ دے موقع تے قوم دے ناں اپنڑے سنھیے اچ آکھیے جو قیام پاکستان پاروں بر صغیر پاک و ہند دے مسلماناں کوں اپنڑے تہذیبی تشخص کوں پروان چڑھاونڑ، مذہبی آزادی اتے ترقی دے مساوی حقوق میسر تھئے جیرھے جو متحدہ ہندوستان دی ہندو اکثریت انہاں توں کھسنڑ تے تلی ہئی ۔گزریل ستر سال توں گھن تے اج تئیں دے حالات و واقعات اساڈے آباواجداد دے وژن اتے سوچ دی وسعت و صداقت دی گواہی ڈیندن ۔ اج دا ڈینھ اساکوں شاعر مشرق علامہ محمد اقبال دے افکار اتے بابائے قوم قائد اعظم محمد علی جناح دے فرمودات دے پاسے رجوع کرنڑ دی ترغیب ڈیندے تاں جو اساں انہاں مقاصد دا حصول ممکن بنڑاﺅں جیرھا جو قیام پاکستان دے وقت بحیثیت قوم اساڈا نصب العین ہن جنہان دے حصول کیتے اساڈے آباو اجداد اپنڑاں سارا کجھ قربان کیتا میکوں اے اکھیندے ہوئیں فخر تھیندے جو پاکستانی قوم کہیں وی مصیبت دا مقابلہ کرنڑ دی صلاحیت رکھیندی اے ۔
میکوں مانڑ اے جو پاکستانی قوم کہیں وی مصیبت اتے اوکھ دا مقابلہ کرنڑ دی وڈی صلاحیت رکھیندی اے ،انشاءاللہ اساں ایں آزمائش اچ کامیاب تھیسوں،وزیراعظم عمران خان دا یوم پاکستان تے سنیہا
مضمون کا ماخذ : ہرکیولس اور پیگاسس
متعلقہ مضامین
