اسلام آباد۔22دسمبر (اے پی پی):وفاقی وزیر اطلاعات سینیٹر شبلی فراز کابینہ اے اجلاس توں بعد میڈیا کوں بریفنگ ݙیندے ہوئیں آکھیے جو کورونا دی ݙوجھی لہر پاروں ہسپتالاں اچ ٻوجھ ودھدا ویندے اتے عدالت دا وی فیصلہ ہئی جو اجتماعات توں اجتناب کیتا ونڄے جیڑھے علاقیں اچ پی ڈی ایم دے جلسے تھئن اتھاں کرونا وائرس دی شرح تکھے ودھدی پئی اے ۔انہاں آکھیے جو وزیراعظم کابینہ اجلاس اچ بجلی سیکٹر کوں بہتر کرݨ کیتے سخت محنت دی ہدایت کیتی اے۔وزیر اطلاعات شبلی فراز آکھیے جو اجلاس اچ مارگلہ روڈ تجاوزارت ہٹاوݨ دی ہدایت کیتی ڳئی اے۔انھاں آکھیے جو کابینہ اجلاس اچ اقتصادی رابطہ کمیٹٰی دے 16 تے 20 دسمبر دے فیصلیں دی توثیق کیتی ڳئی اے۔وفاقی کابینہ وزارت داخلہ کوں ای سی ایل اچ ترمیم دی اجازت ݙتی اے اتے ای سی ایل اچ وزیر داخلہ تے وزیر قانون تے مشتمل کمیٹی ہوسی ای سی ایل دی حتمی منظوری کابینہ توں ڳھدی ویسی۔کابینہ زرعی ترقیاتی بینک دے بورڈ آف ڈائریکٹر دی نویں سروں تشکیل دی وی منظوری ݙتی اے۔کابینہ مردم شمار متعلق رپورٹ مشترکہ مفادات کونسل اچ پیش کرݨ دی وی منظوری ݙتی اے،کابینہ سی ڈی اے آرڈر 1960اچ ترمیم دی وی منظوری ݙتی اے۔
