وزیرخارجہ شاہ محودقریشی دی ایرانی ہم منصب نال ٹیلی فون تے گال مہاڑ

ایران اچ کورونا وائرس پاروں ودھ سارے جانی ضیان تے ڈکھ تے افسوس تھئے ، ایرانی حکومت اتے عوام جیں بہادری نال عالمی وبا دا مقابلہ کریندی پئی اے او قابل تحسین اے ،
اسلام آباد ۔ 22 مارچ (اے پی پی) وزیرخارجہ شاہ محودقریشی ایران اچ کورونا وائرس نال تھیونڑ آلے جانی ضیان تے ودھ سارے ڈکھ تے افسوس دا اظہار کریندے ہوئیں آکھیے جو ایران دی حکومت تے عوام جیں بہادری تے جوانمردی نال ایں عالمی وبا دا مقابلہ کریندی پئی اے او یقیناً قابل تحسین اے ۔ اے گال انہاں اتوار کوں ایران دے وزیر خارجہ جواد ظریف نال ٹیلی فون تے گال مہاڑ کریندے ہوئیں آکھی اے ۔کرونا دے عالمی وبا دے حوالے نال گال مہاڑ کیتی گئی ۔ وزیر خارجہ اپنڑے ایرانی ہم منصب کوں اوکھے ویلھے اچ ایران تے لاتیاں گیاں پابندیاں مکاونڑ دے حوالے نال وزیراعظم عمران خان اتے پاکستان ولوں عالمی سطح تے کیتیاں ونجنڑ آلیاں کوششاں دا ڈسایا ۔انہاں ایرانی وزیر خارجہ کوں ڈسائے جو انہاں دی کل جرمنی دے وزیر خارجہ نال گال تھئی تے اساڈی درخواست تے انہاں وعدہ کیتے جو کل یورپی یونین دے وزرائے خارجہ اجلاس اچ ایں معاملے کوں چیسن ۔ وزیرخارجہ آکھیے جو انہاں مطالبہ کیتے جو ایں عالمی وبا کوں سامنڑے رکھیندے ہوئیں قرضے دے بوجھ تلوں آئے ، ترقی پذیر ملکاں کوں قرضے ڈیونڑ اچ سہولت ڈتی ونجے تاں جو اپنڑے وسائل کوں ایں وبا نال نبڑنڑ کیتے بروئے کار گھن آسگن ۔انہاں آکھیے جو او سارک وزرائے خارجہ نال وی رابطہ کرتے انہاں کوں ایران تے پابندیاں مکاونڑ دے حوالے نال گال کریسن ۔ اساں اسلام آباد اچ پی فائیو ملکاں دے سفیراں توں وی گزارش کیتی اے جو او اپنڑے اپنڑے ملکاں کوں پیغام ڈیون جو انسانی ہمدردی دے تحت ایران تے لاتیاں گیاں معاشی پابندیاں کوں ہٹایا ونجے ۔ وزیرخارجہ آکھیے جو پاکستانی زائرین جیرھے جو ایران توں بذریعہ تفتان واپس آندے پن انہاں کوں آئسولیش اچ رکھنڑ کیتے سکھر اتے ملتان اچ قرنطینہ مراکز قائم کییتن ۔ ایرانی وزیرخارجہ آکھیے جو صدر روحانی دی ہدایت تے زائرین دی طبی سہولت کیتے ہفتے کوں ڈو ہسپتالاں کوں بارڈر ایریا اچ مختص کیتا گے اے زائرین اساڈے مہمان ہن انہاں دی خدمت اساں فرض سمجھدوں ۔ ایرانی وزیر خارجہ جواد ظریف ایران توں پابندیاں چاونڑ دے حوالے نال پاکستان ولوں کیتیاں ونجنڑ آلیاں کوششاں تے وزیراعظم عمران خان تے وزیرخارجہ مخدوم شاہ محمود قریشی دا شکریہ ادا کریندے ہوئیں آکھیے جو پاکستان برادر ملک تھیونڑ دے ناطے، اوکھے ویلھے جیرھا کردار اد کیتے او مثالی اے ۔